Ungdomsrådet september 2025. Nyvald leiar Alva Betine Kilvik nr. sju frå venstre. Nestleiar Eivind Økland nr. seks frå venstre.

Konrad Ørn har vore leiar av ungdomsrådet fram til juni. På det siste møtet før ferien gav kommunestyret Ørn fritak frå vervet i ungdomsrådet. Også Karoline Solbakk fekk fritak for vervet i rådet.

Alva Betine Kilvik og Eivind Økland vert leiarar av ungdomsrådet fram til det skal veljast nytt ungdomsråd frå 2026.

- Eg har vore med i ungdomsrådet lenge og har leiarerfaring frå elevrådet og elevorganisasjon. Eg ønskjer å særleg engasjera meg i arbeidet med å førebyggja ungdomskriminalitet. Det er viktig å arbeida for gode møteplassar for ungdomane, seier den nyvalde leiaren.

Vil styrkja grunnbemanninga

Ungdomsrådet nytta høvet til å koma med innspel til budsjett for 2026 og økonomiplanen for 2026-2029. Rådet meiner at tiltak og tenester retta mot barn og unge må skjermast i budsjettarbeidet. I uttalen frå ungdomsrådet heiter det at låg grunnbemanning i kommunen fører til høge kostnader til vikarar, og at dette kan vera lite effektiv bruk av ressursar. 

Rådet ber difor om at kommunen vurderer tiltak for å styrkja grunnbemanninga i tenester der det er mykje vikarbruk for å redusera utgifter og sikra meir stabile tilbod. Dette gjeld spesielt i skular og barnehagar for å sikra stabilitet for barn.

Andre saker behandla av ungdomsrådet 23. september:

• Framskaffing av omsorgsbustadar i samarbeid med private aktørar - vegen vidare
• Planprogram for arealdelen til kommuneplanen med strategiar og prinsipp for framtidas utvikling – Høyringsforslag
• Tenesteskildringar helse og velferd - etter høyring
• Svar på høyring om arealnormer, utforming og bruk av kompenserande tiltak på uteområde i skular
• Kvalitetsmelding 2024-25 for grunnskulen i Øygarden kommune

Her kan du lesa innkalling med saksdokument.


Tekst og foto: Vigleik Brekke