Ordførar Tom Georg Indrevik gratulerte jubilanten med den store dagen. Tre søstrer frå venstre; Grethe Rong, Borgny Torsvik og Karen Torsvik.Borgny er den i familien som hugsar namn, fødsels- og andre merkedagar i slekta. Denne gongen var det hennar tur.
- Det er alltid hyggeleg å få helsa på innbyggjarar som vert 100 år. Men det er jo spesielt når det er for tredje gong i same søskenflokk, seier ordførar Tom Georg Indrevik.
Borgny vaks opp på Nese på Torsvik saman med sine sju sysken. Etter kvart trefte ho på Olav frå Huse i same bygda. Dei gifta seg og bygde seg hus på Heimtun tidleg på femtitalet nordaust på Torsvik.
Då nedgangstidene kom til Øygarden, flytta Borgny og Olav til Bergen der dei budde i Rognlien (Arna), Michael Krohns gate og Frøkenstiftelsen der Olav var vaktmeister. Borgny dreiv kolonialhandel i Bergen, jobba i Irma og seinare hjå Fylkesmannen i Hordaland.
Borgny tok handelsskule og sertifikat og fekk stor glede og nytte av dette. Ho var aktiv, og fram til ho var 90 år var ho den eldste og den fremste i treningsgruppa på Rong Senter.
Det var stas å få besøk av ordføraren.Borgny Torsvik har i alle åra støtta og gått i bresjen for bedehuset på Torsvik. Saman med styret arbeidde ho med å få på plass nødvendige utbetringar som skifte av vindauge, varmepumpe og oppvaskmaskin.
Ho «prøvebudde» på Tednebakkane omsorgssenter denne våren, men ho kjende seg for sprek til å vera der, og lengta heim att til Heimtun.
- Jau, det er bra å vera her, men eg likar meg godt på Heimtun, sa Borgny.
Slik gjekk det. Ho opplever det godt å bu der.
Vi gratulerer 100-årsjubilanten!
Tekst/redigering: Vigleik Brekke
Bakgrunnsinformasjon: Øyvind Strandheim
Foto: Ottar Vik