Som pårørande har du rett til generell informasjon og rettleiing når du tek kontakt med helse- og omsorgstenestene. Dette gjeld både i den kommunale helse- og omsorgstenesta og i spesialisthelsetenesta.

Helsepersonell har lov til å gi generell informasjon til pårørande utan å bryte teieplikta – også utan samtykke frå brukar. 
Dette kan til dømes vere:

• kontaktinformasjon til tenestene
• kven som jobbar der og kva tilbod som finst
• korleis ein søker hjelpemiddel, velferdsteknologi eller støtte
• informasjon om lovverk, saksbehandling og rettar
• tilbod for pårørande, både barn og vaksne
• informasjon om brukar- og pårørandeorganisasjonar
• rett til opplæring og rettleiing 

Når brukaren treng hjelp – har du rett til meir informasjon

Jo mindre brukaren sjølv er i stand til å ta vare på eigne interesser, desto større rett har du som pårørande til å få informasjon. 

Dersom brukaren er over 16 år og ikkje kan ivareta eigne interesser, har næraste pårørande rett til naudsynt informasjon for å vareta brukaren sine rettar og interesser.

Rett til tolk

Du har rett til å få informasjon på eit språk du forstår. Det skal nyttast kvalifisert tolk, barn eller andre pårørande skal ikkje brukast som tolk. 

Les meir om tolketenester

Les meir om rettar for pårørande:

• Helse Norge - Pårørandes rettigheter
• Rettigheitsoversikt – Pårørendesenteret