Bakgrunn
Omstillingsprogrammet til Helse og velferd starta opp i 2024, og handlar om å møta samfunnsendringane vi står overfor. Fleire eldre er positivt for folkehelsa, men inneber også at mange fleire innbyggarar vil ha behov for helse- og omsorgstenester i framtida. Det handlar både om at vi ikkje har råd til å fortsetta på same måte som før, men også om at vi ikkje framover vil ha nok helsepersonell.
Omstillingsprogrammet er hovudsatsinga til kommunen for utvikling og omstilling av helse- og velferdssektoren. Gjennom programmet vert det arbeida med fleire små og store grep som skal gjera at vi tilpassar oss framtida og samfunnsendringane. Det handlar om korleis vi kan førebyggja meir, korleis vi bruker fagfolk, kompetanse og pengar best mogleg og korleis vi best mogleg tilpassar tenesta til framtidig behov. Vi ser langt fram i tid, slik at vi allereie no tek gode val for framtida. Det må vi gjera for å sikra at framtidige generasjonar også får tilgang på gode helse- og velferdstenester.
Vi kan ikkje løysa framtida sine utfordringar ved berre å betra jobben vi gjer i dag. Framover må vi tenkja nytt. Det krev innovasjon og nye måtar å arbeida på. Det kan også bety at kommunen framover ikkje skal eller kan levera same tilbod som i dag.
Du kan lesa meir om behovet for omstilling i evalueringsrapporten til PwC, gjennomført i 2023. (PDF, 5 MB)
Ulike satsingsområde i omstillingsprogrammet
I omstillingsprogrammet er det valt ut fem satsingsområde. Det betyr at alle aktivitetar og prosjekt i omstillingsprogrammet handlar om omstilling og utvikling innafor desse fem satsingsområda. Satsingsområda er valt ut på bakgrunn av politiske føringar gjennom ulike planar og innspel frå tilsette i helse- og velferdsektoren.
I møte med utfordringsbilete framover er det avgjerande å styrka fokuset knytt til førebygging og mobilisering av innbyggjarar og deira eigne ressursar. Det handlar både om å sikra førebygging i eigne tenester, men også om å legga til rette for at innbyggjarane våre meistrar eigne liv lengst mogleg.
Prosjekt under tidleg innsats kan til dømes vera råd og rettleiing retta mot innbyggjarar for å meistra eigen helse- og bustadsituasjon, eller mobilisering av frivilligheit.
Eit viktig ledd i arbeidet med å omstilla og effektivisera helse- og velferdstenesta handlar om å ta i bruk tilgjengeleg og ny teknologi. Når vi omstiller ulike deler av tenesta vurderer vi alltid korleis teknologi kan bidra til høgare kvalitet og/eller meir effektiv drift av tenesta.
Prosjekt under dette satsingsområde kan til dømes vera meir bruk av teknologi i analyse- og planleggingsarbeid, innføring av ulike digitale hjelpemiddel og verktøy til innbyggjarane våre eller effektivisering av forvaltningsoppgåver.
Ei av hovudutfordringane for framtidig helse- og velferdstenester handlar om mangel på arbeidskraft. Framover vert det viktig å bruka dei ressursane vi har på best mogleg måte. Både tenester og arbeidsoppgåver må truleg organiserast på andre måtar enn i dag. Det kan til dømes handla om å reindyrka oppgåver som krev høgskuleutdanning og å unngå å binda opp helseressursar i oppgåver som ikkje krev dette.
Vidare vert det også nødvendig å ha fokus på heiltidskultur, ulike arbeidstidsordningar og tiltak for å rekruttera og behalda viktig arbeidskraft.
Prosjekt innanfor dette satsingsområde kan til dømes handla om korleis vi arbeidar for å sikra at vi bruker helsekompetansen der det er nødvendig.
For å lukkast i arbeidet med omstilling er det nødvendig å sikra kompetanse og kapasitet til dette arbeidet. Det handlar både om å frigjera tid til utvikling og innovasjon, sjølv i tider der driftsoppgåvene krev mykje fokus. Organisatoriske endringar og tydelege avklaringar av roller og oppgåver er viktig for å sikra ein mest mogleg effektiv organisasjon.
Både PwC-rapporten og Øygarden 2040 (langsiktig driftsanalyse og investeringsplan) peikar på behov for store investeringar framover innan helse- og omsorgsbygg. Det handlar både om å sikra kapasitet i heildøgns omsorgsplassar, kommunale utleigebustadar med meir.
Kva er eit omstillingsprogram?
Det å organisera omstillingsarbeidet i eit program er eit nytt grep i kommunen. Eit program er ein struktur som gjer det mogleg å koordinera og gjennomføra ei rekke prosjekt og tiltak som kan vera avhengig av kvarandre, og må virka saman for å oppnå store endringar.
Gjennom programmet skal vi sikra god oversikt over ulike aktivitetar og utviklingsarbeid som pågår. Vi skal prioritera tydeleg kva innvasjons- og utviklingsarbeid som vert sett i gong, slik at brukar tida våre på det som er mest viktig. Tydeleg prioritering er også viktig for at vi har nok gjennomføringskraft i dei uilke prosjekta våre, og at vi faktisk får til endring og omstilling.
Kva ønsker vi å oppnå?
Gjennom omstillingsprogrammet ønsker vi å prioritera prosjekt som bidreg til at vi når målsettinga om å:
- Oppnå ei berekraftig helse- og velferdsteneste i framtida
- Tilby tilpassa tenester med god kvalitet
- Vera ein attraktiv arbeidsgjevar
Organisering av programmet
Styringsgruppa består av kommunedirektøren og hans leiargruppa. Styringsgruppa har det overordna ansvaret for programmet.
Kommunalsjef for helse og velferd er programeigar. Det betyr at kommunalsjefen er ansvarleg for å levera gevinstar og effektar i programmet.
Programkontoret støttar og legg til rette for god program- og prosjektstyring. Det inneber å støtte og rettleia ulike prosjektleiarar, og sikra god planlegging og gjennomføring i dei enkelte prosjekta.
Prosjektleiar planlegg og gjennomfører ulike prosjekt.