Viruset smittar gjennom nær kontakt med ein smitta person, eller ved kontakt med eit smitta dyr. Det må høg grad av nærkontakt til for å bli smitta, og dei mest utsette er seksualkontaktar og husstandsmedlemer. Det tek 5-21 (vanlegvis 6-13) dagar frå ein vert smitta til symptom oppstår.

Symptom er feber, trøyttleik, muskelsmerter og hovudpine. Ein del utviklar hovne lymfekjertlar, og samstundes eller etter nokre dagar kjem kløande og/eller smertefullt utslett. Utslett vert utvikla til blemmer som deretter får skorper, tørkar inn og fell av. Arr kan førekoma. Utslett kan oppstå på heile kroppen, men det er i dette utbrotet særleg rapportert om utslett nedantil rundt kjønnsorgan og endetarm, samt rundt munnen.

Ein er smitteførande frå symptoma kjem til skorpene har falt av og det er heil hud under. Normalt tar dette 2-4 veker. Det mest effektive tiltaket for å redusera smitte av apekoppar er å avgrensa tal på intime partnarar, samt isolasjon og smitteoppsporing kring påviste tilfelle.

Kontakt lege dersom du opplever symptom, og mistenkjer at du har vore i kontakt med person som er smitta med apekoppar. Det vert teken prøve frå utslett med ein pensel, ein kan også ta prøve frå nase eller hals. Ein kan ikkje testa seg før ein har symptom.

Dei fleste treng inga behandling anna enn symptomlindring som febernedsetjande eller smertelindring. I sjeldne tilfelle er det aktuelt med sjukehusinnlegging.

Undersøking, testing og behandling er gratis.

Øygarden kommune har inngått samarbeid med Bergen kommune om vaksinering mot apekoppar.

Smittevernkontoret i Bergen vaksinerer ein torsdag i månaden.

Desse får tilbod om vaksine

• menn eller transpersonar som har sex med menn OG
• som har risikoåtferd OG
• som har hatt syfilis, gonoré eller klamydia siste 24 månader

Alle tre punkt må vere oppfylte for å vera i målgruppa som vert vaksinert i kommunal regi.

Risikoåtferd inneber hyppig partnarbytte, tilfeldig sex, gruppesex og chemsex.

Vaksinen krev to dosar med minimum 28 dagar mellom dose 1 og 2.
Første vaksinasjonsdag er torsdag 16. mars. Du må tinga time på førehand.

Timebestilling opnar torsdag 9. mars. Ring smittevernkontoret på 55 56 58 80 for å tinga time.

Ikkje møt opp om du er sjuk, har feber over 38 grader eller andre teikn på infeksjonssjukdom. Ring då for ny time.

Vaksinasjonen kostar 225 kroner. Sjølve vaksinen er gratis.

Ta med gyldig legitimasjon med bilete og personnummer til vaksinetimen.

Ved oppmøte må du også visa dokumentasjon på prøvesvar som syner at du har hatt ein av dei seksuelt overførbare infeksjonane syfilis, gonoré eller klamydia i løpet av dei siste to åra.

Ein må sitja til observasjon minst 20 minutt etter vaksinering.

Smittevernkontoret held til i Bergen Helsehus, Solheimsgaten 9, 4.etasje, 5058 Bergen (sjå kart). Nytt inngang C, bakke opp til parkeringsdekk ved 2.etasje.

Smittevernkontoret er universelt utforma, heis ved inngang C i 2.etasje.

• Helsenorge om Apekoppar
• FHI om Apekoppar
• Helseutvalget - Vi jobber for bedre seksuell helse - uansett hvem du er og hvem du elsker