Har du ikkje høve til å stemma i den ordinære perioden for førehandsstemming eller på valdagen? Då kan du tidlegstemma frå 1. juli til og med 9. august ved både kommunestyrevalet og fylkestingsvalet.

Kven kan tidlegstemma?
Alle som har stemmerett, kan tidlegstemma. Tidlegstemming er først og fremst ei ordning for deg som ikkje kan stemma i den ordinære perioden for førehandsstemming eller på valdagen. Du treng ikkje dokumentera dette.
Ver merksam på at dei ordinære stemmesetlane ikkje er klare i perioden for tidlegstemming. Då brukar vi ein eigen stemmesetel med namn på alle registrerte politiske parti i Noreg.
Dersom du ønskjer å stemma på eit parti eller ei gruppe som ikkje står oppført på stemmesetelen, kan du skriva namnet på partiet eller gruppa i det tomme feltet.
Kvar kan ein tidlegstemma?
Du kan tidlegstemma innanfor ordinær opningstid på Innbyggartorget og biblioteket på Sartor Storsenter. Hugs å ta med gyldig legitimasjon!
Sist endra 17.11.2026 17.32