Kva er ei politivedtekt?

Ei politivedtekt er ei lokal forskrift som utfyller politilova. Ho regulerer mellom anna bruk av offentlege område, arrangement, orden, reinhald og aktivitetar som kan påverka tryggleik og framkome. Forskrifta gjeld i heile Øygarden kommune.

Viktige reglar for innbyggjarar og verksemder

Politivedtekta inneheld mellom anna reglar om:

• ro og orden på offentlege stader
• nattero mellom kl. 23.00 og 06.00
• camping og parkering i parkar, grøntområde og friområde
• bruk av offentlege område til framvisingar, reklame og andre aktivitetar retta mot publikum
• tryggleik ved byggearbeid, sprenging og anna arbeid nær område med offentleg ferdsel
• ansvar for å sikra bygningar og tak når det er fare for snø- og isras
• reinhald og tiltak mot forsøpling og tilgrising

Reglar for arrangement

Mange arrangement på offentleg stad krev at arrangøren melder frå til eller søkjer om løyve frå politiet. Dette gjeld særleg arrangement som kan påverka orden, tryggleik eller trafikkavvikling. Målet er å leggja til rette for trygge og gode rammer for både arrangørar, deltakarar og andre som ferdast i området.

Bidreg til eit trygt og triveleg lokalsamfunn

Politivedtekta skal gjera det tryggare og enklare å ferdast på offentlege stader. Ho skal òg ta vare på omsynet til naboar, miljø og framkome. Kommunen oppmodar innbyggjarar, lag, organisasjonar og verksemder om å gjera seg kjende med innhaldet i forskrifta.

Forskrifta

Heile forskrifta finn du her på Lovdata.