Innspela kan handla om kvar eller korleis du ønskjer at vi skal bygga i Øygarden. Du kan også koma med forslag til stader vi ikkje bør bygga, for å ta vare på naturen, landskapet, friluftsinteresser, tilkomst til sjø eller anna som er viktig for deg. Innspela treng ikkje vera retta mot ein særskilt stad, og kan til dømes handla om kva som er viktig at vi legg vekt på der vi skal bygga ut (innspel til føresegner). Les meir om kva vi ønskjer innspel om lenger nede på denne sida.
Vi ber om at du registrerer innspela dine i den digitale innspelsportalen:
Gje innspel her
Nedanfor kan du lesa alle innspela som har kome inn så langt. Dersom det er vanskeleg å navigera i oversikta, tilrår vi at du opnar ho i eit eige vindauge her.
Merk at det kan ta inntil ein verkedag før innspelet ditt er synleg i løysinga.
Har du spørsmål?
På innbyggartorga og biblioteka på Rong, Straume og i Skogsskiftet kan du få hjelp til å legga inn innspel i kartet. Her finn du informasjon om opningstid.
Vi ønskjer særleg innspel om
Innspel som er ikkje er i tråd med arealstrategiane og senterstrukturen i samfunnsdelen, eller i konflikt med strategiane i planprogrammet blir ikkje vurdert. Les meir om dette mot slutten av denne sida.
- Er det område som i dag er sett av til bygging, som vi ikkje bør bygga på?
- Tidlegare i denne prosessen har vi fått mange gode innspel på kva som er viktige stader å ta vare på for framtida. Vi vil framleis at du viser oss konkrete område som du meiner vi ikkje bør bygga på. Dette kan til dømes vera natur eller grøne område som er viktige for deg eller lokalmiljøet ditt, område som gir tilkomst til sjø eller er ein stad du meiner er fin slik den er. Fortel oss gjerne kva som er viktig med denne staden.
Vi ønskjer innspel om areal som kan fortettast og utnyttast betre, slik at vi ikkje treng å ta av til dømes natur eller landbruk for å bygga og utvikla. Du kan også gi innspel ved ønskje om endring av eksisterande byggeformål, til dømes fordi området bør transformerast til noko anna, eller at formålet bør bli tilpassa betre til dagens bruk.
Har du innspel om konkrete areal der vi kan bygga mindre bustader, både i små hus eller som leilegheiter? Sjå gjerne til bustadstrategien som viser kvar i kommunen vi skal kunna bygga ulike bustadbygg.
- Vis oss område ved sjøen som er viktige for aktivitetar og rekreasjon, eller område som kan utviklast som ein felles møteplass i lokalmiljøet ditt.
- Vi ønskjer også innspel om område der vi enkelt kan etablera universell tilkomst til sjø.
Som oftast vil det vera mogleg å ha tilleggsnæringa som ein del av gardsbruket og arealformålet landbruk-, natur- og friluftsformål (LNF), men kanskje du har ein god idé som krev endra arealbruk? Har du spørsmål om dette kan du treffa administrasjonen på kontordagane.
- Små næringar i bygdene kan vera med på halda liv i lokalmiljøa rundt om i kommunen. Har du innspel til areal som kan nyttast til lokal næringsutvikling?
- Reiseliv og næring basert på opplevingar er eitt av satsingsområda i den nye arealdelen til kommuneplanen. Samstundes er naturen og verdiane våre viktige å ta vare på for at Øygarden skal fortsetta å vera attraktiv som bustadkommune, og for at vi får tilreisande som ønskjer å besøka oss. Vi ønskjer innspel om arealbruk som kan bidra til eit berekraftig reiseliv i Øygarden.
- Vi ønskjer særleg innspel til areal som kan utviklast innan reiseliv og opplevingar tett på sentera våre, for å kunna utnytta eksisterande infrastruktur.
- Vi ønskjer også innspel om eksisterande kaier og naust som kan vidareutviklast til fiskeri.
I arbeidet med ny arealdel har vi definert sentrumskjernar innanfor alle lokalsentera, kommunedelsentera og kommune- og regionsenteret. For å styrka sentrumskjernane med meir konsentrert bygging av bustader og forretning eller andre private tenester, ønskjer vi innspel på konkrete areal til dette.
- Vi skal framleis kunna bygga spreidde bustader i bygdene, men vi må samstundes ta vare på landbruksjord, det særeigne landskapet og naturverdiar. Derfor kan vi ikkje lenger ha store arealform for LNF- spreidd slik vi har i gjeldande arealdel. Dagens areal vil bli reduserte mot verdiar som landbruksjord, kystlyngheier, men også aktsemdsområde og bratt terreng.
- Vi ønskjer innspel om tomter som ikkje er i konflikt med blant anna verdiar som landbruksjord og viktig natur, og som enkelt kan få tilkomst ved å nytta eksisterande vegar.
Har du innspel til område der vi kan restaurera natur? Område for naturrestaurering kan til dømes vera bekkar som er lagt i rør eller eit gammalt planert område som aldri har vorte utvikla, og ligg der som eit sår i landskapet. Les gjerne meir om naturrestaurering her.
- Det er også mogleg å komma med innspel til føresegnene til den nye arealdelen. Ta gjerne utgangspunkt i føresegnene til gjeldande planar, og vis oss føresegner som ikkje er gode eller som fører med seg ei utbygging vi ikkje ønskjer.
- Det er også mogleg å komma med forslag til nye føresegner. Då er det fint om de forklarar kva de ønskjer å oppnå gjennom bruk av føresegner, framfor sjølve formuleringa. Til dømes kva for bygging skal vi opna opp for, eller om det er nokre avgrensingar de meiner vi ikkje bør legga i dei nye føresegnene?
Kva legg kommunen vekt på når vi vurderer arealbruk?
Øygarden kommune har i gjeldande planar store arealreservar. Det vil seia at vi har sett av for mykje areal til blant anna bustadbygging og næringsutvikling enn kva vi vil greia å bygga fram mot 2039. Dei statlege forventingane er derfor at vi reduserer omfanget av bygging i den nye arealdelen. Kommunen har, gjennom samfunnsdelen og planprogram for ny arealdel med strategiar, vore tydelege på kva verdiar vi skal ta vare på og ikkje bygga ned, men også kvar og korleis vi skal prioritera å utvikla.
Gjeldande arealbruk i alle planar, arealinnspel om nye utbyggingsområde og innspel om andre tema som t.d. føresegner vil bli vurderte ut ifrå om dei er i tråd med:
- Strategiane om verdiar vi skal bevara og utvikling for framtida, som er vedteken saman med planprogrammet for ny arealdel til kommuneplanen 2027-2039. Vi kjem til å grovsila arealinnspel ut i frå om dei er i konflikt med verdiar eller fareområde. Desse områda er markerte som blå på kartet i innspelsportalen. Vi ønskjer innspel til dei områda som ikkje er fargelagde.
- Arealstrategiane og senterstrukturen i samfunnsdelen.
- Statlege føringar som arealbruk og mobilitet, klima og energi, strandsona, jordvern og barn og unge sine interesser.
- Regionale planar med føringar for kommunal arealplanlegging.