§ 1. Heimel
Forskrift om ordensreglement ved ØUS er fastsett med heimel i opplæringslova § 9 A -10 (ordensreglement) og § 9a (skulemiljøet).
§ 2. Formål
Ordensreglementet skal bidra til å skape eit godt og trygt skulemiljø som fremjar helse, trivsel og læring.
§ 3. Verkeområde
Reglementet gjeld på skuleområdet, på skulevegen, på turar/arrangement i skulen sin regi og ved aktivitet på It`s learning. Normalt gjeld ikkje reglementet i fritida, med mindre handlingar i fritida får konsekvensar for elevar sitt psykososiale miljø på skulen(nettmobbing).
§ 4. Ansvar
Både foreldre, elevar og tilsette har ansvar for å skape eit trygt, godt og mobbefritt skulemiljø der elevane trivst, bryr seg om kvarandre og har det bra. Alle må ta sterk avstand frå hærverk, vold, mobbing, trakassering og all krenkjande åtferd.
§ 5. Plikter for tilsette
§ 5.1 Opplysningsplikt
Rektor/teamleiarane og kontaktlærarane har ansvar for å gjere ordensreglementet kjent for elevar og foreldre ved oppstart av skuleåret.
§ 5.2 Handlingsplikt (Oppl.lova § 9a-3)
Dersom nokon som er tilsette ved skulen får kunnskap eller mistanke om at ein elev vert utsett for krenkjande handlingar som mobbing, diskriminering, vald eller rasisme, skal vedkommande snarast undersøkje saka og varsle skuleleiinga, og dersom det er nødvendig og mogleg, sjølv gripe direkte inn.
§ 6. Eleven sine rettar
Eleven har rett til eit godt fysisk og psykososialt miljø, rett til å oppleve tryggleik og sosialt tilhøyr og rett til å forklare seg før tiltak mot regelbrot vert sett i verk.
§ 7. Eleven sine plikter
Eleven har plikt til å vise god åtferd og folkeskikk, følgje ordens-og trivselsreglane og rette seg etter beskjedar/instruksjonar/pålegg frå lærarar, teamleiar, rektor eller andre tilsette som arbeider ved skulen.
§ 8. Rett til å be om tiltak
Foreldra og elevar har rett til å be skulen om tiltak for å rette på psykososiale og fysiske miljøtilhøve. Oppmodingane kan skje skriftleg og munnleg.
§ 9. Rett til å klage
Om skulen ikkje innan rimeleg tid har teke stilling til saka, vil det likevel kunne klagast etter føresegnene i forvaltningslova som om det er gjort enkeltvedtak. (Oppl.lova § 9a-3).
§ 10. Vurdering i orden og åtferd
Grunnlaget for vurdering i orden og åtferd er knytt til kva grad eleven opptrer i tråd med ordensreglementet til skulen. ….I vurderinga i orden og i åtferd skal det takast omsyn til føresetnadene eleven har. Til vanleg skal det ikkje leggjast avgjerande vekt på enkelthendingar; unntaket er dersom enkelthendinga er særleg klandreverdig eller grov…..(Jf oppl.lova § 3-5).
§ 11. Tiltak ved brot på ordensreglane
Det er kun rektor som kan melde frå til politiet om alvorlege brot på ordensreglane, som kan krevje elev/foreldre om økonomisk erstatning for skadeverk og som kan utvise elevar ein heil dag eller inntil 3 dagar. Lærarane har mynde til å visa bort elevar frå eiga undervisning for ei opplæringsøkt, avgrensa til to klokketimar. Lærar lagar eit skriftleg notat som vert arkivert. Foreldre vert orientert munnleg og ved perioderapport.
(Sist rev 16.06.2023 TO).