Skulefritidsordninga vert driven etter § 13.7 i Opplæringslova og dei retningsliner og krav som gjeld for tildeling av statstilskot.

Øygarden kommune er eigar av skulefritidsordningane. Eigar lagar vedtekter, opprettar og legg ned ordningar. Kommunestyret gjer vedtak om omfang av kommunal eigenandel og foreldrebetaling.

Skulefritidsordninga er eit omsorgs- og fritidstilbod før og etter den obligatoriske skuletida for alle elever på 1.- 4.trinn. Elever på 5.- 7.trinn med særskilde behov, kan også søkja plass i skulefritidsordninga.

Skulefritidsordninga skal leggje til rette for leik, sosial læring, kultur og fritidsaktivitetar med utgangspunkt i alder, funksjonsnivå og interesser. Vidare skal skulefritidsordninga gje barna omsorg og tilsyn. Barn med særskilde behov skal gjevast gode vilkår for utvikling. Skulen sine generelle mål gjeld også for skulefritidsordninga.

Øygarden kommune er ansvarleg for drift av dei skulefritidsordningar som er omfatta av desse vedtektene.

Einingsleiar er administrativt, økonomisk og fagleg ansvarleg for drift av den einskilde ordninga innanfor rammer som er satt av lov, forskrifter, vedtekter og budsjett.

Skulefritidsordninga skal ha eigen leiar, SFO-leiar, dersom det er fleire enn 23 barn. SFO-leiar får delegert mynde frå einingsleiar til administrasjon av skulefritidsordninga, fagleg utvikling og dagleg personaloppfølging, og er ein del av skulen sitt leiarteam.

Det skal veljast foreldrerepresentantar på lik linje med ein vanleg klasse. Foreldrerådet sitt arbeidsutval (FAU) skal då utvidast med ein representant frå skulefritidsordninga.

Samarbeidsutvalet er styre for skulefritidsordninga.

Statsforvaltaren i Vestland fører tilsyn med skulefritidsordninga.

SFO-leiar skal ha relevant pedagogisk utdanning. Rettleiande norm for bemanning i skulefritidsordninga er 14 – 16 barn per tilsett.

For barn med særskilde behov og vanskar, vert det tilsett ekstrahjelp etter behov og sakkunnig vurdering.

• Alle elevar i 1. – 4. klasse er sikra plass etter søknad. Eleven har plassen til plassen vert sagt opp eller ut 4. klasse.
• Leiar i skulefritidsordninga og einingsleiar administrerer plass i SFO.

Søknadsfrist for hovudinntaket i skulefritidsordninga er 15.april.

Eleven har plassen ut 4.klasse, eller til plassen blir oppsagt.

Dersom plassen til eit barn vert sagt opp eller endra i skuleåret, er det 1 månad skriftleg oppseiingstid, gjeldande frå den 15. i kvar månad.

Ved oppseiing eller endring av plass etter 15. april, må ein betale for SFO-plassen ut skuleåret.

Ved flytting frå kommunen gjeld oppseiingsreglane.

Søknad skjer elektronisk

Opphaldsrom og uteareal skal vera godkjent etter plan og bygningsloven, byggjeforskrifter, kommunehelsetenesta, arbeidsmiljølova, lov om produktkontroll og forskrift om miljøretta helsevern i barnehagar og skular.

Basearealet skal vera minimum 2,5 m2 pr elev. Som baseareal vert rekna innvendige opphaldsrom som er i fast bruk i heile opningstida i skulefritidsordninga. I tillegg bør skulefritidsordninga kunne disponera nødvendig tilstøytande klasserom og grupperom. Døme: skulekjøkken, gymsal, aktivitetsrom. Barn med særskilde behov og vanskar skal ha tilgang til alle rom som skulefritidsordninga nyttar.

Kvar skulefritidsordning definerer sine uteområde utifrå dei lokale forholda.

Bygg og uteområde skal vera godkjente i h.h.t. miljøretta helsevern. Skulefritidsordninga er ein del av skulen sitt helse, miljø og tryggleiksansvar.

Føresegn i Barnekonvensjonen artikkel12 og kapittel 9A i opplæringslova er gjeldande for skulefritidsordninga, jf § 9A- 1. Etter § 9A- 2 har alle elevar rett til eit trygt og godt skulemiljø som fremjar helse, trivsel og læring.

Skulefritidsordninga skal finansierast gjennom statleg tilskot, kommunalt tilskot og eigenbetaling frå foreldra.

Kommunestyret fastsett betalingssatsane som skal vere lik for alle kommunale skulefritidsordningar, jf.Opplæringslova §13-7 femte ledd.

§ 10.1 Statleg tilskot

Tilskotssatsane for skulefritidsordninga vert fastsett gjennom det årlege statsbudsjettet.

15 % av det tilskotsbeløpet som vert utbetalt til den einskilde kommune, skal gå til å styrke tilbodet til elevar som treng særskild hjelp etter sakkunnig vurdering.

§ 10.2 Kommunalt tilskot

Kommunen dekkjer alle utgifter til lokale, mellom anna husleige, lys, varme, reinhald og vaktmeister, utstyr, uteareal og dei administrative kostnadane.

Meirutgifter til barn med særskilde behov og vanskar utover det statstilskotet dekkjer, vert dekka av kommunen.

§ 10.3 Opphald og foreldrebetaling

Foreldrebetalinga skal vera med å dekka kostnadane til løn for ordinært personale tilsett i skulefritidsordninga og driftskostnader til materiell og utstyr.

Det er fire alternativ for opphald:

• Heil plass, frå kl. 07.00 til kl. 16.30/17.00
• Redusert plass kl. 07.00 til kl. 15.30
• Etter skuletid til kl. 15.30/16.30/17.00
• Morgonopphald før skuletid frå kl. 07.00 til skulestart

Samarbeidsutvalet ved den enkelte skule kan vedta endring i opningstid innafor dei økonomiske rammene til SFO.

• Ved den einskilde eining kan det verte ekstra betaling for mat/drikke.
• Det vert kravd foreldrebetaling for 10 terminar pr. år. Utanom dette vert det kravd ekstra betaling for opphald i skulen sine ferie- og fridagar, og for tilfeldig dagsopphald.
• Dersom eleven vert henta for seint i SFO, må foreldra betala ei avgift for kvar påbyrja halvtime. Det vert ikkje gitt søskenmoderasjon ved for sein henting av fleire elevar.
• Det vert kravd betaling for opphald etter dei betalingssatsane og retningslinene som til ei kvar tid er vedteke av kommunestyret.
• Det vert gjeven søskenmoderasjon på 30% for barn nr 2 og 50% for barn nr 3 og 4.
• Foreldre på 1. og 2. trinn, med dokumentert lav inntekt kan etter søknad få redusert foreldrebetaling, pr elev skal prisen vere maksimalt seks prosent av inntektene til hushaldet. *
• Barn med spesielle behov på 5.-7.trinn som har sakkunnig uttale der hovuddiagnosen gjer at det er til barnet sitt beste å vere i SFO, har gratis plass.*

*Tilføyd ved ny forskrift 1B til Opplæringslova 2 juli 2020 nr. 1492 (i kraft 1. aug 2020)

§ 10.4 Tilpassa plassar

• Barn med spesielle behov, frå 5. til og med 7. klasse.
• Barn med plass av sosial/pedagogiske grunnar, betalar pr time. Timane må avtalast på førehand.
• Det er eigne satsar for kriseplass, dagplass og enkelttimar. Kontakt den einskilde SFO for meir informasjon.

Skulefritidsordninga må ha tilgang til kjøkken der det kan lagast enkle måltid. Barna må ha med seg matpakke til fellesmåltidet.

Ved enkelte skulefritidsordningar kan det vere tilbod om matservering mot ekstra betaling.

Skulefritidsordninga følgjer planleggingsdagane til skulen.

Opningstid heile året kl 07.00 – kl. 16.30/ 17.00

Samarbeidsutvalet ved den enkelte skule kan vedta endring i opningstid innafor dei økonomiske rammene til SFO.

SFO følgjer skuleruta.

Det er tilbod om ferie-SFO i  haust- og vinterferie, og i sommarferie – inntil 2 veker i juni etter at skulen tek ferie, og inntil 2 veker i august før skulestart på nokre skular. SFO er stengd i juli.

Ferietilbodet i sommar-, haust- og vinterferie vert lagt til enkelte skuler i kommunen etter behov.

Spesialavdelinga på Hjelteryggen skule har eige ferietilbod. Tilbodet er ope for barn med spesielle behov frå alle skulekrinsar i kommunen.

Påmelding til SFO i feriane skjer på eige skjema ein finn elektronisk på kommunen si heimeside. Påmeldinga er bindande.

Det vert kravd ekstra foreldrebetaling for ferieopphald – beløpet vil gå fram av påmeldingsskjemaet.

Søknadsfristen for desse tilboda er 4 veker før haust- og vinterferie og 15.april for sommar-SFO.

Elevane har kollektiv ulukkesforsikring i den tida dei er i skulen/SFO, samt på direkte veg til og frå skulen/SFO. Skulen/SFO er ikkje erstatningspliktig for klede, sko, briller eller gjenstandar barna har med seg eller som vert borte/øydelagde i skule/SFO si opningstid.

Klage på enkeltvedtak (opptak, oppseiing, endring av opphaldstid) kan påklagast etter Forvaltningsloven kapittel VI. Eventuell klage sendes skulen. Klagefrist er 3 veker. Endeleg klageinstans er den kommunale klagenemnda i Øygarden kommune.