Helse og omsorg er ei stor kommunal oppgåve. Alle spådomar for framtida seier at vi blir eldre og lever lengre, noko som vil føra til at vi treng fleire hender inn i omsorgsyrka. Effektivisering, rasjonalisering og innsparingar er daglegtale for alle som budsjetterer, utførar innkjøp, planlegg og skal yta innan omsorgstenesta. Det blir stadig testa ut nye idear og verkemiddel, men ikkje alle gir effektivitetsverdiane vi ønskjer. Finst det ny teknologi som kan effektivisera og optimalisera endå meir? Korleis kan vi til dømes redusera utanforskap i alle aldersgrupper og kva med digital utanforskap. Kan vi få til noko som tener fleire sider av utfordringane? 

Korleis kan vi sikre gode, tilgjengelege og berekraftige tenester for alle – også i framtida?

Her ønskjer vi å utforske nye løysingar innan helse, omsorg, oppvekst og sosialtenester. Vi ser etter prosjekt som:

• møter behova i ei aldrande befolkning
• tek i bruk teknologi for betre tenester
• styrkjer førebygging og tidleg innsats
• fremjar livskvalitet og deltaking og som bidrar til mindre utanforskap

Døme: Digitale helsetenester, betre samarbeid mellom kommune og frivillige, eller bruk av data for meir treffsikre tenester.

På alle område og i alle bransjar er miljø og berekraft på agendaen.  Dersom ein bedrift treng noko utstyr som nabobedrifta har,  kan dei då samarbeida om utstyr slik at ein ikkje treng å eiga alt,  og kan ein ombruka eller gjenbruka lokale/utstyr eller maskiner på ein ny måte? Finst det måtar å redusera klimagassutslepp endå meir enn det vi gjer i dag? I Energiparken finn vi Northern Lights som skal lagra CO2 under havbotnen. Vi har også ein hydrogenprodusent. Er det nokon som kan utnytta dette, og kanskje gi noko til dei andre aktørane i området? Vil næringslivet få lån i framtida eller vil taksonomien gjere det vanskeleg og dermed det grøne skifte ta lengre tid? Det finns gjerne fleire spørsmål enn svar, men vi er sikre på at det finst gode idear som kan vera med og løysa noko av utfordringane. 

Vi ønskjer initiativ som:

• reduserer klimautslepp og miljøpåverknad
• fremjar sirkulær økonomi og grøn innovasjon
• styrkjer berekraft i næringslivet
• engasjerer innbyggjarane i grøn omstilling

Døme: Klimasmart transport, lokal energiproduksjon, grøn teknologi eller berekraftige bygg.

Øygarden er ein langstrakt kommune med både urbane sentrumsområde og meir rurale strøk. Dette gjev oss kort veg til naturen og eit attraktivt byliv, med mange moglegheiter. Tilbodet innan dagens kollektivtransport kan gjera det utfordrande å femna om alle behova til befolkninga. I dag må vi til dømes i stor grad følgja faste ruter og tider på bussane. Dei unge trekkjer fram at dei ønskjer meir fleksibilitet innan kollektiv transport, og eldre treng gjerne transport tettare på heimen. Korleis kan vi tenkja «utanfor boksen» og gjera mobilitet meir fleksibelt, men også økonomisk for leverandørane slik at det er levedyktig? Eit berekraftig mobilitetssystem vil gje betre infrastruktur og sikra vekst i heile kommunen - både innan bustader og næringsliv. 

Korleis kan vi gjere det enklare og meir berekraftig å koma seg rundt?

Vi ser etter løysingar som:

• gjer det lettare å gå, sykle og reise kollektivt
• tek i bruk ny teknologi for smarte transportløysingar
• knyter saman bygder og bydelar
• reduserer transportbehov og utslepp

Døme: Delingsløysingar, autonome køyretøy, betre mobilitet for eldre og personar med nedsett funksjonsevne.

Kompetanse bedrifter treng i framtida er gjerne ikkje lett å sjå i dag. Elektrifisering og teknologisk utvikling skjer fort, og for mange kan det vera utfordrande å følgja med. Vi må sikra god kopling mellom utdanningsinstitusjonar og skular til næringslivet, slik at vi byggjer kompetanse som møter framtidas behov.  Når dei som er unge i dag skal vera leiarar i framtida, kva vil dei sjå etter i eigenskapar, kompetanse og utdanning? Det seiast at generasjon z har eit anna syn på arbeidsforhold og ønsker gjerne å jobba fleire stader. Kunstig intelligens er komen for å bli, og korleis vil dette påverka behova innan arbeidskraft. Sit du med eit konkret behov for kompetanse som ein ikkje har løyst utdanninga på, eller sit du på ein ide om korleis vi kan forma utdanningsløp, kurs, leiarutvikling med vidare?

Kva kunnskap og ferdigheiter treng vi – og korleis får vi dei?

Her ønskjer vi prosjekt som:

• fremjar livslang læring og omstillingsevne
• styrkjer samarbeid mellom skule, næringsliv og forsking
• utviklar nye utdanningstilbod
• bygg digital og teknologisk kompetanse

Døme: Lokale læringsarenaer, praksisnære utdanningar, eller opplæring i grøn teknologi.

Klyngar og hubb`ar med bedrifter som jobbar tett saman har suksess ved å spela kvarandre gode. Bedrifter kan samarbeida på tvers av kvarandre, anten med kunnskap, ressursar eller informasjon, og gjennom dette skapa konkurransefortrinn. Finst det forslag til meir samhandling, meir samarbeid?

Korleis kan vi samarbeide betre – på tvers av sektorar, fag og miljø?

Vi ønskjer initiativ som:

• bygg tillit og felles forståing
• utviklar nye samarbeidsformer
• fremjar samskaping og medverknad
• nyttar Øygarden som testarena

Døme: Tverrfaglege innovasjonsprosjekt, samskapingsverkstader, eller digitale plattformer for samarbeid.