I Noreg kan alle flagge når dei vil, t.d. på bursdagar og andre merkedagar. Vi har likevel reglar som både privatpersonar og offentlege institusjonar må følgje ved flagging med det norske flagget – uavhengig av om det vert flagga på offisielle flaggdagar eller ved private merkedagar:

• ”Lov om Noregs Flag” (Flaggloven) datert 10.12.1898. Lova fastset korleis flagget skal sjå ut og bruken av det.
• ”Forskrift angående bruk av statsflagget og handelsflagget” datert 21.10.1927 og sist endra 03.12.2004. Forskrifta fastset nærare reglar for bruken, blant anna offisielle flaggdagar og når flagget kan heisast og firast.
• ”Lov om flagging på kommunenes offentlige bygninger” datert 29.06.1933.
• ”Forskrift om adgang til i særlige tilfelle å benytte fremmed lands flagg ved siden av det norske flagg på kommunale offentlige bygningar” datert 06.07.1933.

Flaggforskrift (1927) § 6 viser til tidspunkt for heising og firing av det norske flagget:

”Flagget heises i månedene mars til og med oktober kl. 0800, i månedene november til og med februar kl. 0900. Flagget hales ved solnedgang, dog ikke senere enn kl. 2100 hvis solen går ned etter denne tid”.

Å flagge på halv stong vil seie at flagget fyrst skal heisast heilt opp (heil stong), haldast der eit augeblikk, og så firast på ”halv stong” – som er ein tredjedel ned frå toppen av flaggstonga.

Ved gravferd skal det flaggast på halv stong inntil seremonien er avslutta. Når kista er komen i jorda og seremonien er avslutta skal flagget heisast til topps og firast til vanleg tid.

Det er ikkje tillate å heise to flagg, eller ein kombinasjon av flagg og banner / vimpel, på same flaggstong.

Det norske flagget finnast i to utgåver; statsflagget og handelsflagget. Statsflagget er splitta og blir berre brukt av statlege institusjonar. Handelsflagget er det folk flest reknar som nasjonalflagget. Dette er rektangulært med storleiksforholdet 8:11.

Nasjonalflagget er Noreg sitt symbol og skal behandlast med respekt.

Eit flagg skal ikkje røre ved bakken, klippast i eller til smussast på nokon annan måte.

Når eit flagg vert bytta ut, t.d. ved at det har vorte falma, skal flagget makulerast før restane av flagget vert kassert.

Øygarden kommune flagger med det samiske flagget på samefolkets dag.

Øygarden kommune flagger ved rådhuset, kommunedelsenteret i Skogsskiftet og kommunedelsenteret på Rong med regnbueflagget under Bergen pride arrangement.

I tillegg til det norske nasjonalflagget har vi også andre nasjonar sine flagg og det samiske flagget. Utanlandske flagg skal ikkje heisast med mindre det norske flagg også vert heisa. Eit framand land sitt flagg kan heisast ved sidan av det norske flagget der det er naturleg som ei ærevising, jf. forskrift om framande land sine flagg på kommunale bygg (1933).

Eit framand land sitt flagg skal ikkje gjevast ein meir framtredande plass enn Noreg sitt flagg. Utanriksdepartementet viser til at det norske flagget bør ha forrang ved nasjonale hendingar. Ved feiring av nasjonaldagen er det Noreg som feirast, men det er ingenting i vegen for at andre nasjonars flagg kan brukast den dagen. I so fall bør det avgrensast til flagg som vert haldne i handa.

Det bør ikkje brukast andre nasjonar sine flagg som konkurrerar med det norske i størrelse og plassering.

Ein vimpel vert definert som eit trekanta flagg der lengda er større enn høgda. Ein vimpel skal ikkje vere lengre en 1/3 av flaggstonga si lengde. Her eksisterar både nasjonalvimplar og namnevimplar med logo.

• Nasjonalvimpel – det norske flagget, med eller utan kors, i vimpelutgåve
• Namnevimpel – Øygarden kommune har ingen eigen kommunevimpel med kommunelogo

Det er ikkje same reglar ved bruk av vimpel som ved bruk av flagg. Vimplar kan henge oppe utan tidsavgrensing, dvs. heile natta og i heile perioden den er aktuell.

Arrangementsflagg og arrangementsbanner, dvs. flagg/banner med arrangementsmotiv eller logo, vert brukt til profilering av eit arrangement eller ein arrangør knytt til ei særskilt hending.

Eit banner skal i hovudsak henge loddrett ned langs flaggstonga med største lengde langs flaggstonga. Det bør stillast krav til både kvalitet og utforming av arrangementsflagg og banner.

Øygarden kommune, som lokalsamfunn med MOT, har eit arrangementsflagg med MOT-logo.

Flaggforskrift (1927) § 4 viser til at det skal flaggast med statsflagg ved statlege verksemder på dei offisielle flaggdagane, som er:

Dessutan viser flaggforskrift (1927) § 4 til at statlege verksemder kan flagge med statsflagg ved andre høgtidelige og festlige høve innan nasjonen eller kongehuset og ved offisielle besøk av medlemmer av kongehuset og av utanlandske statsoverhovud og fyrstelige personar. Ein statsinstitusjon kan også flagge når det vert sett på som særleg viktig eller ynskjeleg for den utøvande verksemda i institusjonen.

Sjølv om nasjonale flaggreglar fyrst og fremst gjeld statlege myndigheiter så er det ynskjeleg, frå utanriksdepartementet si side, at kommunar heisar det norske handelsflagget – nasjonalflagget – både på offisielle flaggdagar og ved andre særskilte høve som omtalt i forskrifta.

Øygarden kommune ved Einingsleiar Eigedom, drift og vedlikehald har ansvar for at det vert flagga med nasjonalflagg ved Øygarden rådhus, kommunedelsenter Skogsskiftet og kommunedelsenter Rong på alle offisielle flaggdagar, og ved andre særskilte høve etter samråd med ordførar eller rådmann. Heising og firing av nasjonalflagget på rådhuset vert utført i tråd med gjeldande flaggreglar.

Øygarden rådhus har to offisielle flaggstenger. Flaggstonga nærast rådhuset sin hovudinngang skal berre brukast til nasjonalflagget og Øygarden kommune sin kommunevimpel. Kommunevimpelen er i dagleg bruk på flaggstonga. På flaggdagar når nasjonalflagget skal heisast må kommunevimpelen firast men vimpelen kan heisast igjen når nasjonalflagget er fira. Den nedste flaggstonga kan brukast til andre vimplar / arrangementsflagg etter avtale, t.d. MOT, men ikkje samstundes med at nasjonalflagget heng oppe. Den nedste flaggstonga kan også brukast til andre nasjonalflagg, ved sidan av det norske flagget, som ei ærevising jf. pkt. 2.4.2.

Kommunedelsenter Skogsskiftet har to offisielle flaggstenger. Ei er plassert i nordre enden av parkeringsplassen ved kommunedelsenteret og ei er plassert ved gangvegen frå Skogevegen mot fyrlykta.

Kommunedelsenter Rong har to offisielle flaggstenger. Desse er plassert ved innkjørselen til parkeringsplassen ved hovedinngangen på kommunedelsenteret.

Øygarden kommune ved einingsleiar i Eigedom Drift Vedlikehald og/eller tenesteleiar ved bygget har ansvar for flagging ved andre kommunale bygg med flaggstong. Eventuell flagging vil her vere avgrensa til hendingar som fell på ordinær arbeidsdag og flagget vert heisa og fira innan ordinær arbeidstid – med unntak av døgnbemanna institusjonar.

Ved Stortingsval og Kommunestyreval skal det flaggast med nasjonalflagg på valdagen ved alle oppnemnte røystelokale. Leiar i røystestyra er ansvarleg for flagginga.

Øygarden kommune skal flagge på halv stong på offisielle flaggstenger ved gravferda til:

• Noverande og tidlegare ordførarar og andre noverande politikarar – flagging på halv stong ved Øygarden rådhus, ved kommunedelsenter Skogsskiftet og ved kommunedelsenter Rong
• Noverande tilsette – flagging på halv stong ved tenestestaden der vedkomande var tilsett
• Bebuarar i kommunale institusjonar – flagging på halv stong ved institusjonen der vedkomande budde
• Særskilte høve – flagging på halv stong etter avtale med rådmann og ordførar eller etter nasjonale føringar

Dersom ulike arrangørar ynskjer å bruka kommunen sine offisielle flaggstenger til flagging i samband med konfirmasjon, gravferd, anna arrangement, så må søknad om flagging vera einingsleiaren ved Eigedom Drift og Vedlikehald i hende i god tid før arrangementet. Dette gjeld uansett type flagg/vimpel som arrangøren vil bruke. Gjeldande flaggreglar i punkt 2 må følgjast ved flagging med nasjonalflagget.

I dei tilfeller der det kjem inn fleire søknader om flagging for same dag/tidsrom, vil den fyrst innkomne søknad normalt få fortrinnsrett. Alle kostnader ved flagging skal dekkast av arrangøren med mindre anna er klarert med kommunen i god tid på førehand.