Vi skil mellom grunnvaksinasjon og oppfriskingsvaksinasjon. For oppfriskingsvaksine, sjå eige avsnitt lenger ned. 

Følgande grupper tilrådast grunnvaksinasjon dersom denne ikkje allereie er fullført, uavhengig av gjennomgått infeksjon: 

• 65 år og eldre
• Personar i aldersgruppa 18-64 år som inngår i ei risikogruppe
• Gravide

Det er ikkje lenger tilrådd grunnvaksinering til personar i aldersgruppa 18-64 år utan underliggjande risikofaktorar. 

Dei fleste grupper vert rekna som grunnvaksinert etter 2 dosar med vaksine. Personar med alvorleg svekka immunforsvar får tilbod om tre dosar for å reknast som grunnvaksinert. 

I Øygarden kommune tilbyr vi vaksina Comirnaty (BioNTech og Pfizer). Tilrådd minumumsintervall mellom dose 1 og 2 er 21 dagar. Mellom dose 2 og 3 minimum 4 veker. 

Beskyttelse frå grunnvaksinering svekkast over tid, og det vil for nokre vere naudsynt med oppfriskingsvaksinasjon. Tal på vaksiner ein har teke vil variere mellom ulike grupper avhengig av alder og risiko. I tillegg vil gjennomgått infeksjon med Covid-19 redusere behov for tal på vaksinedosar. Dei over 75 år fekk tilbod om ei 5.dose kornavaksine våren 2023, medan andre grupper kun har vore tilrådd 3.dosar totalt.

Målgrupper for ny oppfriskingsdose før haust-/vintersesong 23/24 er som følgjer: 

• Aldersgruppa 65 år og eldre, og sjukeheimsbebuarar
• Aldersgruppa 18-64 år som inngår i ei risikogruppe
• Aldersgruppa 12-17 år med alvorleg grunnsjukdom
• Aldersgruppa 5-11 år med alvorleg grunnsjukdom etter individuell vurdering
• Gravide

Ein tek sikte på oppstart kring veke 40 hausten 2023.

Andre med behov for oppfriskingsdose

Enkelte som er utanfor dei gruppene som er tilrådd ei ny oppfriskingsdose denne hausten vil ha behov for, eller ynskje om oppfriskingsdose av andre årsaker. Dette kan vere grunna reise, studieopphald, familie situasjon eller andre årsaker. Ta kontakt med vaksinetelefonen for rettleiing og vaksinering.

Personar i aldersgruppa 18-64 år med følgjande sjukdom/helsetilstander er vurdert å ha auka risiko for alvorleg sjukdomsforløp av covid-19:

• organtransplanterte
• alvorleg og moderat immunsvikt
• immundempande legemiddelbehandling som ved autoimmun sjukdom
• hematologisk kreftsjukdom siste fem år
• annan aktiv kreftsjukdom, pågåande eller nyleg avslutta behandling mot kreft (spesielt immundempande behandling, strålebehandling mot lungene eller cellegift).
• alvorleg nevrologisk sjukdom eller muskelsjukdom som førar med seg nedsett hostekraft eller lungefunksjon (f.eks. ALS og cerebral parese)
• Downs syndrom
• kronisk nyresjukdom og nyresvikt
• kronisk leversjukdom eller betydeleg nedsett leverfunksjon
• demens
• kronisk lungesjukdom, inkludert alvorleg astma som har ført til bruk av høydose-inhalasjonssteroidar eller steroidtablettar siste året
• fedme med kroppsmasseindeks (KMI) på 35 kg/m2 eller høgare
• kroniske hjerte- og karsjukdom (med unntak av høgt blodtrykk)
• hjerneslag
• diabetes, då særleg pasientar med langvarig eller dårleg kontrollert sjukdom eller diabetesseinkomplikasjonar