Kulturhistora gjennom Kystmuseet

Øygarden kommune samarbeidar tett med Stiftinga Kystmuseet i Øygarden. Kystmuseet og kommunen samarbeidar om verdiskapingsprosjektet Perler i Nordsjøløypa.

Kystmuseet i Øygarden ligg ved den gamle dampskipskaia i Ovågen. Museet formidlar kunnskapen om korleis menneska i Øygarden har brukt naturen rundt seg til å skapa seg eit livsgrunnlag og danne samfunn. Museet legg til rette for at de besøkande skal få kjennskap til denne historia gjennom utstillingar, filmvising, guida utflukter og sykkelturar.

Hovudutstillinga "Hav og vind - Jord og eld" viser korleis kystfolket har nytta naturen og ressursane ulikt gjennom tusenvis av år. Som besøkande får de kjennskap til korleis ulike samfunn har vekse fram i Øygarden, og korleis dagleglivet i dette vêrharde stroket av vestlandskysten har endra seg opp igjennom tidene.

Kystmuseet i Øygarden tek vare på kulturminne i sitt opphavlege miljø, både for samtida og for framtida. Ved museet ligg eit særeige sjøbruksmiljø med over 20 ulike sjøhus og naust med båtar og reiskap. På kaien står det ei stor saltebu frå den tida då sildefisket framleis var rikt.

Etter besøket kan de nyta tradisjonsrik mat i kafeen eller ta turen innom museumsbutikken. Her er også trådlaust nettverk.

Meir informasjon :

Kystmuseet i Øygarden

Publisert av Beate Hetlevik. Sist endra 04.01.2016
Fann du det du leita etter?